Geguritan

Jujur

Pancen angel...

Pancen susah...

Apa maneh yen salah

Ora bakal muni

                Jajal delokna kae

                Gayane ngaku bener

Nanging durung mesthi pener

Mung gawe pantes-pantes salahe

Kasunyatan sing ana ing kene

Ana jujur dikira ajur

Padahal ya marake makmur

Wiwite jujur mesthi susah nanging mburine mesthi bungah

Adil

Adila dadi pejabat?

Adila dadi rakyat?

Adila dadi wong sugih?

Adila dadi wong mlarat?

                Adil kuwi angel yen diangel-angel

                Bisa adil marang liyan kuwi apik

                Apik gawe siji lan sijine manungsa

                Adil dudu kelakuan sing ala,ananging mulya

Ora kabeh wong bisa adil

Namung wong kuwi sing wegah adil

Apa maneh dikon adil

Di kon jujur wae wegah

Amanah

apa kuwi amanah?

Apa iseh sedulur karo fatonah?

Amanah.....

Ndak ya menepati janji?

                Jajal diangen-angen

                Menawa bener maknane

                Terus sapa sing kudu amanah

                Wong gendheng,genjik,apa koruptor?

Jarene amanah kuwi abot sanggane

Lha apa nyunggi kayu sak pikul

Jajal tak takon maneh

Apa kuwi amanah?

Seneng

Nguya-nguyu

Mesam-mesem

Ati bungah merga seneng

Seneng saka polahe dewe

                Delok wong sing disayang dadi seneng

                Merga seneng iku saka ati

                Kebeneran yen bisa seneng

                Mbok kepeksa naning ora bakal sengsara

Ngapusinan

Ngapusi kuwi kepenak

Ananging kowe gelem diapusi

Ngapusi marake lara ati

Apa maneh ngapusi gawe seneng

Mikir...?

Yen ngapusi kuwi kepenak

Mikir....?

Yen ngapusi kuwi barakah

Aja padake panduwurane dewe

Sithik-sithik ngapusi

Sing jare gawe nyarutang

Nyarutang utange merga klakuane dewe

Sabar

Sabar akeh berkahe

Sabar methi akeh godane

Sabar kuwi salah sijine jurus

Juruse wong urip ing alam ndonya

                Wong sing akeh sabare

                Mesthi akeh senenge

                Sabar kuwi ana batese

                Jare sapa ?

Ora kabeh wong gelem sabar

Karepe menang dewe

Ora perduli liyane

Sabar wae wegah apa maneh ngalah

Banjir

Banyu mbuladg turut dalan

Nganti-anti tekan gedunge penduwuran

Ilmune lingkungan,jare gaweyan

Gaweyane sapa ora ngerti

                Ora ngerti apa ora ngaku

                Bolongan dibumpeti

                Kali diregeti

                Klakoane manungsa dhewe

Dadi ora usah bingung

Banjir teka

Banjir nyusahke

Pancen nyusahke merga kosokbaline

Longsor

Gundhul,gundhul,gundhul...

Wes kethel alase

Kok ya dicukur gundhul

Iyan nek tukul maneh wiwitane

                Saiki wes akeh kedadeyan longsor

                Lara,duka lan sedih sing dirasake

                Merga tangane clutak

                Negor wiwitan sak penake udele

Ora ana tanggung jawabe

Yen disalahke wegah

Ngangkloh wae yen wis nampa akibate

Mung diguyu karo lemah sing ngubur urip-urip awakmu

Alas diobong

Limang meter ora ketok

Sakmeter ngiyip-ngiyip

Dadane seseg

Watuke njegigis

                Kepenake dhewe wae sing dipengenke

                Ora ngerti wong liya disengsarake

                Jajal takoni ?

                Kenang ngopo alas iki diobong?kowe ngerti?

Jawabne mung gedhek-gedhek

Njur arep nyalahke sapa?

Apa ngerti sing ngobong?

Yen wani ngobong ya tanggung jawab

Nrimo

Senajan iluhku sing kudu tumetes

Pancen kudu tak lakoni

Lara atiku tansah lara

Merga pangucapmu tanpa tata

                Wicara kang ngelantur

                Marai ati iki kudu sareh

                Aku wis ora ana ajine marang pandelenganmu

                Apa maneh marang atimu

Wiwitan ketemu

Klambi biru rok sepan abang

Nalikane ketemu wakmu ing sebelahe greja tuwa

Mesam-mesem,glecam-glecem

Marai degdegan

                Wiwitan ketemu ing sasi wolu

                Ora dinyana nyenggol tanganmu

                Nalikane ana tontonan orkes melayu

                Tanganmu tengen nyangking kresek wadah satru

Kabeh mau ora dipeksa

Apa maneh disengaja

Sing penting awaku seneng ketemu awakmu

Lan muga-muga bakal ketemu

Lalinan

Telung puluh taun kapungkur kulitmu isih alus

Pipine ijeh menus-menus

Ambune kringet tur ora prengus

                Saiki yuswa panjenengan sampun wolongpuluh taun

                Sing maune ayu dadi mengkerut

                Awit saka kulit,untu,lan rambut

Lalinan karo samubarang

Anak,mantu,uga putu

Nalikne dolan mesthi kesasar

Apa wes dadi kodrate panjenengan

Setahun

Pas wis setahun ing tanggal rongpuluh sasi sepuluh

Anggone bapa gelem ngrumati nagari

Rakyatmu akeh sing sumringah

Malah uga akeh sing susah

                Menapa panjenegan kesupen kaliyan janji-janji

                Nyatanipun rakyat sami dados susah

                Masalah bbm lan sandang pangan

                Kang kayane dadi memedi

Sakbanjure apa bapa purun

Purun nyenengake atine kawulane

Bilih boten bapa sinten malih?

Mergane bapa panguasa kang wonten ing mriki

Asu sing kaya manungsa

Kudu nangis batin iki

Nyawang adiku didadeke sasaran

Sasarane asu sing doyan susu

Lan asu sing nduwe napsu

                Uteke apa ora dianggo

                Apa mung digawe ganep-ganep isine ndasmu

                Wong ya durung wayahe adiku nglakoni

                Wes mok peksa kudu gelem nglakoni

Karepmu kuwi apa

Arep ngrusak morale adhi-adhiku su?

Jajal neg sing mok rusak kuwi adhimu dewe

Apa kowe ora kelara-lara su asu!

Kangen

Kangen lho kangen

Wong ayu sing dadi pepujanku

Ora esuk,awan,lan wengi

Mesthi ning pikiranku kuwi awakmu

                Mesam-mesem ning ngarep kaca

                Nganti-nganti simboku dak celuk jenengmu

                Kudu isin ananging kangen

                Wes pokoke kangen karo awakmu

Politik

Ngomongke politik ora ana rampunge

Rampunge yen politik kuwi ora ana

Politik ilang negara apa bisa mlaku

Ketoke ya mung apus-apus

                Uwis tau krungu

                Ana salah sijine wong muni”anti politik”

                Gayane anti politik padahal mangan ya seka politik

                Bener apa ora?

Kok ora percaya piye

Mangan,bensin,ya saka politik

Mosok yo tegel ngomong anti politik

Uwis to mbok ya aja pada munafik

Rembulan

Rembulane wis katon

Radha padang radha peteng

Kayata aku iki

Kang ijeh bingung

                Bingung kerana awakmu

                Bingung karo atimu

                Solah bawamu

                Kang saya suwi saya ora cetha

Apa rembulan iki pertanda

Pertanda kang apa sing tak rasake

Rasa kuciwa

Uga rasa lara kang ora ana lebare

Suwara

Suwara jangkirk

Suwara jenggeret

Apa isih padha krungu?

Yen ora salah ijeh krungu nalikane limalas taun kepungkur

                Saiki suwara apa sing kerep krungu?

                Suwarane wong padu

                Apa suwarane rakyat marang pemerintahe

                Hahahahahhahaha,tapi aja nganti edan merga suwara ya?

Merga sliramu

Merga sliramu aku gelem

Gelem ngenteni sak balimu

Merga sliramu aku dadi

Dadi gendheng ora karuan

                Merga sliramu aku kangen

                Kangen mangan pecel ing pinggir balai

                Merga sliramu aku mati

                Mati rasa ora kaya biasane

Eling

Eling jaman semana

Nuntun pit onthel bareng

Bareng-bareng njegur sawah

Nganti ora ngerti wayah

                Eling jaman semana

                Kelas loro SMA ing kecamatan

                Mlaku menyang kantin wong loro

                Menyang perpustakaan wong loro

Saiki wes padha omah-omah

Awakmu karo jodhomu

Aku karo jodhoku

Sing penting eling jaman semana awakmu karo aku

Globalisasi

Iki jaman globalisasi

Akeh bocah ora gelem ngaji

Senengane ngemek gadget ndelengi tipi

Sing ditiru wong luar negeri

                Rok mini diuri-uri

                Geguritan,kethoprak,ngrawit dadi sambi

                Klambi katon udele dilestarike

                Kon gotong royong akeh alesane

Globalisasi...globalisasi

Sapa katut bisa dituntut

Globalisasi...globalisasi

Kok ngayelke ati

Kanca

Kancaku sak panggonan turu

Turu bareng ing omah cilik

Susah seneng bareng-bareng

Luru pangan ya sambatan

                Kanca kuwi sedulur cepakku

                Sing adoh saka wong tuwaku

                Muga-muga kancaku pada rukun satuhu

                Waras awake waras pikirane

Terminal kalisidi

Anggonmu lunga sing dadi saksi

Saksi janji arep mulih ing sasi siji

Terminal kalisidi isih ngadek ndegegeg

Saksi bisu janji lamismu

                Saiki nendi ragamu

                Wes ora katon ing terminal iki

                Apa wus dadi wong sugih kok ora mulih

Loby B8

Njagong isng sisih kiwa saka njaba

Nyawang aku sing mlaku menyang lantai telu

Karepe pengin kirim salam

Nanging isin karo kahanan

                Rupamu kaya bintang pilem

                Nanging jarene..

                Orapapa sing penting loby B8 dadi panggonan

                Panggonan wiwit ketemu awakmu

Ora mesthi

Ora mesthi sing apik kuwi ala

Sing ala kuwi apik

Saiki akeh wong sing njobo apik

Njerone reget

                Mboh napa kok bisa ngono

                Apa wis watake?

                Nanging pas ketemu kok apike sing ditoke

                Ora alane sisan wae

Rendhengmu dikangeni

Wus radha dawa anggonmu ora ana

Wus radha suwi banyumu tekan ana bumi iki

Mangasmu wus dianti-anti

Karo dulurmu ing ngisor iki

                Ndang sabana ya?

                Kabeh padha ana perlu

                Gawe nyambung uripe

                Uripe sing kaya liyane

Konservasi

Jerene konservasi?

Kok isih ana sampah ing kalen

Jarene konservasi?

Kok wit-witan ditegori

                Konservasi mung dadi embel-embel

                Ben nduwe jeneng luwih saka tunggale

                Konservasine diganti wae

                Dadi konsere wong gendheng

Kahanane

Kuthane apik ndesane kosek

Dalane aspal ndesane gampang

Kahane sing tak rasake

Apa sing marai sugih ki kuthane?

                Nanging yen tak kira ya ndesane

                Beras,kopi,jagung,saka endi

                Kabeh kuwi ya hasile wong ndesa

                Ngopo pembangunan kok ora digateke

Sakkarepe

Sak karepe meh dipiyeke

Sak karepe meh diomong piye

Penting aku ora ana sangkut paute karo kowe

Ora tau ngurusi urusanmu

                Ja meneh dolan bareng

                Makani aku wae ora tahu

                Ben sak karepe

                Sing penting ora mencla-mencle

12 Taun

Wis dicanangke pendidikan wajib 12 taun

Nanging apa kang nyebabke pendidikan ora payu

Sak ngertiku 12 taun sekolah kuwi wis gratis

Nanging tetep wae ora payu

                Lha kok bisa?

                Jarene sing ana gayutane golek dhuwit carane pengemis

                Munine sumbangan sukarela

                Nyatane kok minimale rong juta

Tembang cilikanku

Tembang cilikanku wus ora krungu

Lir ilir,padang mbulan

Kuwi judul tembangku

Nalikane aku kelas telu

                Saiki gantine Aku mah apa atuh

                Judul lagu kanggone wong gedhe

                Tembang cilikanku dirumati sapa

                Yen ora adhi-adhi sak ngisoranku

Musibah

Musibah ora bakal teka

Yen ora diundang

Musibah ora marake susah

Yen ora digugah

                Musibah saiki akeh sing digawe

                Nanging pada sedih ing tembe burine

                Lha karepe ki piye?

                Manungsane pada gedheg-gedheg wae

Ekspor

Mature sulaiman wis wani ekspor

Jagunge sakjuta ton

Berase rongjuta ton

Kopine limangngatus ewu ton

                Ekspore wis dibeneake

                Devisane wis bakal gedhe

                Ora ketang utang ijeh mrana mrene

                Sing penting bisa nyaure

Tkw

Adoh anak bojone

Adoh simbok lan bapane

Adoh saka tangga teparone

Mung golek pangupa jiwane

                Ing negarane dadi kere

                Sakwise mulih dadi Tkw

                Akeh dhuwite

                Lan cepet sugihe

Pawarta

Pawarta ingkang nembe tumut

Ngemutaken babagan rasa

Rasa bingah ingkang katah

Dumugi gantos rasa susah

                Pawarta ing pungkasan

                Pawarta mijil saking ati

                Ngraosaken kahanan ingkang boten mesthi

                Ananing,purun boten purun ingginh diraosaken

Muni saka cangkem

Woi...woi...woi

Tulung,tulung,tulung

Dadaku seseg,irungku bumpet

Langit katon mak prepet

                Cangkemku muni salju...salju...salju

                Nanging,Kok ora bening tur anyes

                Aku takon karo sisihku,iki ana apa?

                Jawabne mung ngelusi dada

Namung tembang

Namung tembang sakmenika

Tembangipun dhandhanggula

Larasipun laras slendro pathet sanga

Wiwitane larasipun “RO”

                Nyariosaken babagan maguru

                Maguru pados nglemu

                Kaliyan guru kang becik martabtipun

                Sakmenika ingkang pantes dipun kawruhi

Purnama pratandha tresna

Ing sasi sura iki

Nyeywuwun berkahing Gusti

Linambaran rasa syukur

Merga ntes nemokake widodari

                Alise nanggal sepisan

                Nalikane ketemu papasan

                Irunge mancung tandha katresnan

                Lambene abang kaya las-lasan

Saknalika tresna kudu tresna

Namung sapisan nyawang

Naning ora dinyana

Purnama iki tandha katresnan

Ngisor  lan dhuwur

Kasunyatane ana ing pandelenganku

Sing ing ndhuwur Omahe gedhe manggrung-manggrung

Sing ing ngisor omahe cilik kaya wc umum

Endhi sing jenenge “MENSEJAHTERAKAN RAKYAT”

                Yen kabeh kuwi pada sawangane yo kepenak

                Ora ana iren-irenan,serik-serikan,uga paten-patenan

                Dhuwurmu merga ana sing ing ngisormu

                Dadi aja kemlinti yen gek neng dhuwur,neg ora pengen ajur

Kertas Dadi Tangisan

Mulih kuliyah ati sumringah

Saktekane lawang ana kresek dicantelke gembokan

Nyelehke tas ing jubin putih

Banjur mbuka isine kresek mau

                Jebul isine tulisan layang

                Layang sing tak kira layang tresna

                Jebulane layang sing marake lara

                Layangmu muni AKU PENGEN PISAH KARO AWAKMU!

Aja salahke

Aja salahke sing nonton udelmu

Yen kaose adhimu ijeh mok enggo

Aja salahke sing ndemek

Yen bolongan ing bokong mlotrok

                Ngko munimu kurang ajar

                Nyatane yo mbok ajari to nduk

                Wong kok ora gelem mikir

                Mikira yen kabeh mau tetep ana jalarane

Seje ati seje lati

Apa sing tak rasake pancen bener

Tuluse tresnaku marang awakmu

Dibales cidra kang marai lara

Pancene bener bayanganku

                Seje atimu seje latimu

                Dekbiyen ngomong janji suci

                Tibane buri janjimu palsu

                Oalah mung ngedemke atiku

Solah bawamu,wicaramu,lugumu ing ngarepku

Beda ing mburiku

Saiki wes kana sakkarep-karepmu

Aku wes madhep mantheb ora kepengen kenal awakmu

Aluwung meneng

Menawi boten mangertos menapa-menapa

Leresipun nggeh mendhel kemawon

Ampun ngantos sok keminter

Mundhak mangkih dados keblinger

                Bilih badhe matur inggih wonten dasaripun

                Boten asal matur nganti-nganti nglantur

                Becikipun inggihb menika sekedhik matur

                Dados boten wonten aranipun kemaki

Sing waras ora laras

Saiki akeh sing ora pati laras

Wong waras ora laras

Wong gendheng dadi pitakonan nomer

Nomer togel sing marai mangkel

                Ngimpi jaran jare sewelas

                Ngimpi gigal seko amben jare meh enthuk cilaka

                Tulunga dipikir kanthi bener

                Ben ora dadi mumet

Sing waras yo digunake warase

Sing gendheng yo ben gendheng

Apa pengin dadi gendheng

Ora klambinan,ora katokan lan ora sempakkan